oleh

70 Hari Tak Dapek Aia

Apo nan Salah jo PDAM Padang Panjang ko?

PADANGPANJANG (Metrans)

Apo kolah nan tajadi di Perusahaan Daerah Air Minum (PDAM) di Kota Padangpanjang. Kok dikecekan perusahaan ko indak sehat, ndak pulo doh. Buktinyo perusahaan daerah tu masih bajalan juo sampai kini.

Sudah tu, kok dikecekan perusahaan ko indak bapitih, tantu indak masuak aka pulo doh. Sabab tiok bulan urang nan manjadi langganan aia barasiah dari perusahaan tu, datang maantaan pitih tagihan rekening aia ka untuak perusahaan tu.


Samantaro bagi nan indak namuah mambayia atau talambek mambayia sabulan atau duo bulan, perusahaan tu indak pulo ado tengang rasonyo doh, aia langsuang diputuih mailia ka rumah urang.

Malah alun lamo ko, tadanga pulo kaba dari Ketua Dewan Perwakilan Rakyat Daerah (DPRD) Provinsi Sumbar, Hendra Irwan Rahim, katiko inyo basamo anggota DPRD Dapil VI malakukan reses ka Kota Padang Pan­jang, Sabtu (26/11/2016), baso DPRD alah maanggarkan dana bantuan dari APBD Provinsi sabanyak Rp14 miliar untuak paningkatan kapasitas perusahaan plat merah daerah tu.

Ndeh..., banyak pitih ma wan, tapi baa kok mamakiak juo palanggan PDAM Kota Padang Panjang ko, karano aia mati labiah dari 70 jam.

Saroman diakui dek Andi Rajo Batuah (37), warga Kalurahan Tanah Hitam, Senin (28/2) kapatang. Inyo mangaku di rumahnyo aia dari PDAM indak mailia samanjak, Sabtu (26/2). Akibaiknyo, kebutuhannyo mulai dari mandi, cuci, kakus (MCK) sarato untuak mamasak tapaso mamintak ka rumah dunsanaknyo nan punyo sumua bor.

“Kalau begini rasanya sangat patut seluruh jajaran PDAM itu dipertanyakan kinerjanya dan diberikan sanksi oleh Dewan Pengawas. Kalau mati sampai 24 jam masih dapat ditelorir, namun sekarang sudah melebihi tiga hari. Sementara kalau terlambat pembayaran rekening, kami sudah disurati dengan ancaman diputus,” keceknyo ka wartawan koran ko.

Nasib samo dialami pulo dek Yanti (40), warga RT 1 Balai Balai. Keceknyo, samanjak aia PDAM indak mailia ka rumahnyo, inyo tapaso mamanfaatkan aia hujan untuak mamenuhi kebutuhan MCK keluarganyo. Sadangkan untuak kabutuhan mamasak, inyo maambiak aia di rumah sajik dakek rumahnyo sacarao bolak balik.

Kabag Produksi PDAM Padangpanjang, Edmil, mangecekan, panyebab masalah nan tajadi tu dikaranoan dek debit aia di reservoar manyusuik, dek karano pasokan dari mato aianyo di Paninjauan manyusuik pulo.

“Sumber dari mata air tersebut yang biasanya mampu menghasilkan air 30-35 liter perdetik, beberapa hari belakangan hanya mencapai 17-19 liter perdetik saja. Sejumlah pelanggan di Balai Balai yang dilayani melalui saluran dari sumber Paninjauan, memang tidak dapat maksimal. Namun saat ini kami tengah berupaya mensuply dari bak penampungan di Simpang Lapan,” kecek si Edmil ko.

Samentara Plt.Direktur PDAM Padangpanjang, Javier, katiko ditamui bara hari nan lampau mangecekan, pihaknyo ka manangani masalah tu sacapeknyo. “Kalau perlu kita akan drop mobil tangki ke TKP," keceknyo maagiah janji. (pul)


COPYRIGHT © METRO ANDALAS 2019



Komentar

Tinggalkan Balasan

Berita Terbaru