CARITO BAGALAU

Vivi Rakhena Anak Tungga

Vivi Rakhena adolah anak tungga babeleng dek pasangan laki bini Nurdin Sembalakon jo Etek Nurbaya. Kok ka dibilang bantuk jo rupa, tibo di padi paja jolong gadang ko iyo sabana padi boneh. Baiiriang iriang rancaknyo jo artis tuo Sofia Latjuba nan mandapek laki bujang ayam, Aril Noah, penyanyi top tu ha !

Kulik paja ko putiah bak cando ubi bakubak. Bulu matonyo taba sarupo samuik sadang demo, yo bana rami.

Kok dipatuik pulo tantang bibia, yo sabana merah merekah bana ko ha, berair-rair gimanaaaa…..getoh. Pokoknyo yo sabana kamek. Padahal, apak paja ko kok disabuik bana, persis bantuak tekong kanai parok. Apo lai amak paja ko—jan kan rancak—tando tando karancak se indak adoh samo sakali dalam dirinyo doh. Sudahlah rambuik kusuik, nan gigi baserak-serak pulo tuh. Ssstttt.... bia iko manjadi rasio awak-awak se yo !


Usuik punyo usuik, ruponyo si Vivi Rakhena ko anak punguik dek Nurdin Sembalakon jo Etek Nurbaya. Paja jolong gadang anak kamanakan dek Nurdin Sembalakon, nan mati dalam musibah oto masuak jurang silaiang tanggiang duo baleh taun nan lampau. Sangkek tu, paja kamek ko baru baumua 6 tahun, inyo salamaik dari musibah tu, sadang bapak mandenyo pudua angoknyo.

Singkek carito, akianyo anak ko dipunguik dek Nurdin Sembalakon jo bininyo. Tapi...., yo sudahlah, kito tinggakan sajo carito tantang punguik ma munguik anak ko, sabab bisa mangaleong ngaleong carito ko beko. Mari kito fokus ka gadih jolong gadang nan putiah sarupo ubi bakubak tu.

Oh yo...., walau paja ko rancak indak tabado manuruik ukuran kampuang, tapi parangainyo agak maleset agak saangin. Ruponyo, namo sabana paja ko nan diagiah dek abak jo amaknyo indak Vivi Rakhena doh, tapi nan tacatat di akte kelahirannyo adalah Nur Epiriani, nan diibau Epi.

Sangkek SD namo ko lai lakek ka diri paja anyia tu. Tapi katiko lah mulai tau jo baun, eeehhh namo tu diganti jo nan labiah rancak manuruik nyo, yaitu Vivi Rakhena. Vivi barasa dari panggilannyo, Epi. Sadangkan Rakhena barasal dari namo almarhum amaknyo, Niar Rakaina. Dalam banak paja ko, dengan maubah namo amaknyo sa angin, manjadi Rakhena, agak ado kesan ka india-india an.

Klau bacarito pagaulan, dek karano maraso dirinyo tacelak, si Vivi ko agak ma miliah-miliah mancari kawan. Kok indak talen jo segeh, indak ka inyo pakawanan bagai tu doh !

Nan pasti, kawan-kawan si Vivi ko yo talen talen pulo. Ado nan bantuak Cik Ani alias Syahrini, ado bantuak Lidah Kandua alias Lidia Kandau, malah ado nan bantuak kambaran Teh Sosro alias Dian Sasro.

Bahkan adoh pulo nan mirip bana jo Tama Balakanam alias Tamara Bleszynski. Dek sabana miripnyo paja ko, susah pulo kito mambedaanyo, antah Tamara Bleszynski paja tu kolah, antah Tamara Balakanam.

Baitu pulo tantang kawan-kawan jantannyo, ondeeeh.... yo sabana ganteng-ganteng bana ko ha. Nan pasti tukang karang carito ko jauh ta tingga 1.000 putaran. Bayangkan se lah, kawan si Vivi ko mirip bana jo Ali Galigali nan populer diimbau Al Ghazali. Sudah tu adoh lo nan mirip jo Coki Takepang alias Choky Sitohang.

Dek maraso punyo kawan talen jo segeh, sombong paja galene ko makin indak tabado doh. Kok ka manyapo urang kampuang, huh... pantang baginyo. Hebatnyo, walau paja jolong gadang ko indak tau diuntuang, urang di kampuang tu indak ado nan maloyo mancaliak parangainyo doh. Ibarat kate orang betawi, udah ketutup aje same kejelitaannye !

Maambiak hikmah dari carito ko, kito diingekan ; katiko manjalini hiduik ndak ado nan sarancak urip sing semadya (hiduik apo adonyo), sarato jan pulo pernah ba angan-angan nan ngayawara (maado-ado), apo lai ngedumeh atau bapoak-poakan diri. (febriansyah fahlevi)


Jangan Lewatkan