Kantua DPRD Padang Panjang Banyak nan Bocor

Salah satu ruangan di Gedung DPRD Kota Padang Panjang, tapaso diatampaung jo embe, untuak manampuang aia hujan nan mailia.

PADANG PANJANG (Metrans)

Anggota Dewan Perwakilan Rakyaik (DPR), baiak nan di pusaik, provinsi sarato kota jo kabupaten, biasonyo mandapek julukan sabagai anggota dewan terhormat. Sabab urang-urang nan duduak manjadi anggota dewan tu, marupoan perwakilan rakyaik badarai, dari daerah pemilihannyo masiang-masiang. Kantua nan ditampatinyo pun dijuluki “rumah” rakyaik.

Sabagai wakia rakyaik nan didulukan salangkah sarato ditinggikan saratiang, tantu anggota dewan terhormat tu salayaknyo mandapek fasilitas agak balabiah dari rakyaik badarai, sarupo kantua nan agak mamadai sarato kendaraan dinas untuak unsur pimpinannyo.


Tapi, di Kota Padang Panjang, anggota DPRD di daerah tu tamasuak malang. Sabab kantuanyo di Jalan H. Agus Salim No.7 RT. IX Kelurahan Guguk Malintang, Kecamatan Padang Panjang Timur, Kota Padang Panjang, Provinsi Sumatera Barat, bantuaknyo bacilapuik.

Dari pantauan wartawan media ko, asa muasa kantua tu bacilapuik dek karano atok kantua tu banyak nan bocor. Sahinggo katiko hujan tibo, aia langsuang mangucua ka loteng kantua DPRD Padang Panjang tu.

Akibaiknyo, dek acok tasiram aia hujan, loteng tu manjadi lapuak, sahinggo lamo kalamoan loteng di kantua tu rarak ciek-ciek. Sahinggo mamudahkan aia hujan tu marembes ka dindiang ruangan di kantua DPRD Padang Panjang ko.

Dek talampau acok aia hujan mailia ka dindiang ruangan di kantua anggota dewan terhormat ko, akianyo dindiang tu manjadi bacilapuik sarato mambuek cat dindiang tu mangalupak jo balumik.

Dari pantauan Metrans di lapangan, Selasa (27/2), atok bangunan sarato loteng kantua DPRD Padang Panjang ko banyak nan bocor. Bahkan plafon bangunan tu mailia aia, nan kalua dari paralon baukuran diameter 10 cm sarato panjang 20 meter, nan alah mulai pacah.

Kecek babarapo urang staf di Setretariat DPRD Kota Padang Panjang ko, kondisi tu sabananyo alah balangsuang lamo.

“Kalau dietong-etong, alah ampia satahun kami maalami nasib sarupo ko,” kecek staf nan namuah maagiah keterangan, tapi anggau manyabuikan namonyo tu.

Keceknyo manambahan, aliran aia nan kalua dari saluran paralon nan alah pecah tu, indak hanyo badampak ka dindiang bagian lua kantua se doh, tapi atok jo lonteng nan bocor tu sampai ka bagian dalam ruangan sarato kakuih alias toilet.

Dari pantauan Metrans, kondisi di dalam ruang kakuih tu, tanyato labiah parah. Kondisi dindiangnyo nampak bacilapuik, saroman indak tauruih. Beberpa plafon bahkan “kuyak”, karano kayu penyanggahnyo rapuah akibaik indak tahan kanai aia taruih.

Ketiko wartawan media ko mancubo mahubungi Zulkifli (Sekwan) sarato Kapalo Bagian Umum Kesekretariatan DPRD Kota Padang Panjang, tanyato urang tu indak tasuo surang alahnyo doh. Kecek salah suorang Satpam di kantua tu, urang nan basangkutan sadang dinas lua, inyo pai kunjungan kerja (kunker) basamo anggota dewan.

Samantaro tu, sabalunnyo Walikota Padang Panjang non aktif, Hendri Arnis, katiko sidang  paripurna istimewa, sabalun liau mamasuki masa cuti Pilkada, alah menyarankan untuak sacapeknyo malakukan renovasi gedung tu.

Hendri maanggap kondisi gedung tu alah indak representatif untuak malakukan aktifitas kerja dalam malayani masyarakaik. (pul)

 


Jangan Lewatkan