oleh

Carito Bagalau

Lah Marasai Dek Niar Bangkak

Carito kini ko hanyo carito oyak oyak, nan basumber dari urang pakak, sakedar untuak galak galak, parintang hati nan sadang samak. Lai suai sanak ?

Tokoh carito banamo Maman Palasu, anak urang limo suku, tingga tapancia di Lubuak Hantu, tiok mangecek mangarasau indak manantu.

Antah iyo antah indak, bebebnyo nan banamo Niar Bangkak tamasuak padusi bagak, ciek kecek ampek garegak, sahinggo mantagi Maman indak tagak. Baju habih kanai kuyak, pulang dari rumah kaki acok tengkak, lancik pun acok kanai sipak.


Maman manikmati “musibah” nan manipo diri, barusaho batahan hari ka hari jo galak mahibur diri, walau muncuang alah tempang ka kiri, persis bantuak urang kanai tampa malapari.

Mungkin alah nasib kabadan diri, bini laruik dalam mimpi, bayang-bayang talampau tinggi, Gunuang Everest ka nyo daki.

Tapaso Maman mauruik dado, sabab karajo awak hanyo kapalo tukang poto, indak mungkin mambuek mimpi bini manjadi nyato.

Singkek carito, dek mantagi lah mulai loyo apo nan adoh langsuang taroroh ka bininyo. Kadang pitih poto lah tabaok sato disetetor pulo. Ujuang-ujuangnyo, anak buah nan manjadi  tukang poto tararau dibueknyo.

Bia banyak nan tapakiak, maman pura pura indak mancaliak, dari pado kanai cakiak, pitih poto baagiahan juo ka si upiak.

Niar Bangkak manyaringai galak, baitu manaromo pitih sabangkak dari sang “kakak”, nan barasal dari urang nan nyo kolak.

Astagfirullahaladzim.... kadang Maman mangucap dalam batin, mangana sikap nan indak lazim. Tapi bilo bayangan Niar Bangkak marasuak batin, Maman baliak manjadi cigin, indak tantu nama nan aspal nama nan palangkin.

Ntah alah tamakan cirik barandang, indak barani Maman mangarengkang, paliang inyo mambalakang sambia basiua jo badendang.

Nan bisa dipabueknyo hanyo mamakak-an talingo, masuak talingo suok, nyo lapehkan langsuang ka lubang ikuanyo.

Dalam kondisi bantuak tu, Maman mulai maraso baso dunia salaweh niru. Sabab, kecek awak sabagai laki indak balaku. Tapi dek tingga tapancia di Lubuak Hantu, tapaso awak basaba se lu dari pado banyak urang tau.

Maman mulai baturo-turo mangana nasib nan dialaminyo ! Tapi, katiko bayang Niar Bangkak tibo, kembali retek tulang ko, samakin ngenek taraso kapalo boto. Singkek carito, Maman tatap indak madok ka rang rumahnyo !

Oooiii... Maman, iduik ang sabana marasai, alah samo raso bawang jo kucai, indak basisieh salam jo sarai, baalah ka raso gulai, alamat salero ka bapetai.

Maman manyadari iduik nan inyo rasai, balain cikarau jo kumpai, babeda ombak jo badai, lain kapunduang lain rambai. Aratinyo, apo nan inyo kandak indak sampai !

Malah baredar kaba kapatang ko, tigo hari manjalang hari rayo, Maman pai ka banda manangkok ikan rayo. Ibo hati di rayo aji patang ko, jan kan samba kupon se ndak tibo.

Hari dingin nyo hampai basangai, baro barapi nan nyo tanai. Baa badan ndak ka sansai, abu dingin inyo pasangai.

Disiko Maman baru taraso, badan buruak indak paguno, nan urang lai diaharagoi bininyo, samantaro awak kadipakudo bini se nyo.

Batambah langkok hiduik nan nyo rasai, bilo ndak bapitih awak acok taabai, bini marauang mintak carai. Dari hari ka hari awak lah bak cando si jablay, kurang pacik kurang awai. Tu ka baa juo laiiii...!

Apokah iko nan banamo takadia ? Antahlah, jikok diagak jo dipikia, baragam kurenah urang di dunia, mungkin lah untuang jo takadia, watak jo sifat urang tantu ganjia-ganjia. Nikmati se lah Man....!

 


COPYRIGHT © METRO ANDALAS 2019



Komentar

Tinggalkan Balasan

Berita Terbaru