oleh

Oleh Uda: Fahlevi

Ujang Fanhoten Sabana Talen

Namo anak si Marah ko ko Ujang Fanhoten, panampilan sabana talen, arlojinyo paten, sapatu keren, sayangnyo lalok di semen.

Kok sisunguik sabana marantiang, rambuik karitiang, kalau maota inyo nan santiang. Tibo di udang, paja ko udang bariang. Kok tibo di urang....?, Aaahhh...., tau ah, gua lagi paniang !

Sabananyo paja ko urang indak bapunyo, hanyo manang digaya senyo. Rumahnyo sajo hanyo paninggalan ninik dari niniknyo. Tapi..., baa juo lai yo, urang picayo ka liau ko.


Yo sudah lah, manga lo awak gerah. Dari pado mamikian anak si Marah, ancak makan nasi basiram kuah, campua sangenek jo patai matah, dijamin hilang sagalo masalah.

Ha.., alah agak tanang tu, awak lanjutkan carito indak manantu, tantunyo tantang Ujang Fanhoten tu !

Kalau baru kenal jo paja galadia ko, alamaik habiah awak dikolaknyo. Malah rang engak bisa dipagalehannyo, baitu bana santiangnyo !

Adoh nan balabiah dari paja ko. Kecek urang, tinggi pulo ruak pado boto. Iko bana modalnyo katiko bacarito. Eehh..., nan mandanga manggango pulo dibueknyo. Yo handia lo yo ? Tapi baalah, namanya juga carito, hohohoho..... Maafin ambo yo bro, sabab batele sajo karajonyo !

Oh yo...., sampai ma citu wak yo, kok gue lupo ! Namanya juga orang tuo nan mangarang carito, tantu basilemak sajo.

Ha...., baru gua takana, ancak carito kita mulai saja, dari pado lupo lo tiba-tiba. Bantuak ini lanjutan ceritanya ha !

Kok pakaro dakek jo urang santiang, pajabat satingket camat sarato lurah, kecek paja ko, inyo lah nan nomor wahid. Baitu pulo soal mamasuakan urang karajo dari ciek perusahaan ka perusahaan lainnyo. Padahal, karajonyo se sampai kini indak pernah duduak doh.

Alun lai soal masuak ma masuakan orang jadi pagawai negeri, keceknyo inyo pulo nan paliang number one.

Ciek lai kebiasaan buruak paja ko, inyo acok bana manggunokan istilah asiang. Antah lai batua antah indak, nan penting bahaso asiang ko ampia indak pernah tingga dek paja ko doh. Kadang inyo pakai istilah Inggirih, sudah tu nyo pakai pulo istilah Parancih. Kadang-kadang dipakainyo pulo istilah Balando, sesekali India, Latin jo Arab. Semati-mati angin nyo pakai pulo istilah Jawa.

Ado nan lemah dari paja ko (maaf jan bayangan nan indak-indak, sagan awak !). Parasaannyo iyo sabana lamah. Buliah kito kecekan inyo urang nan indak baparasaan. Sabab, paja ko indak peka saketek alahnyo jo lingkuangannyo. Inyo pun indak tantu ereang jo gendeang.

Apo se nan tajadi di kampuang, haram dek paja ko ka sato mah. Kok bacarito gotong royong, nan inyo indak pernah sato doh. Adoh-adoh se alasanyo, nan pinggang raso ka putuih lah, nan tampuruang lutuik nan raso ka tangga lah, pokoknyo banyak alasan nan mangamuko.

Apo lai bilo tibo giliran rundo, alasannyo itu ka itu sajo, badan sadang mariang. Alun lai bilo ba carito manjanguak jo ma liek urang kampuang nan sakik atau di timpo musibah, indak akan pernah tasuo puncak iduangnyo tu doh.

Singkek carito, dek parangainyo juolah akianyo tibo giliran si Ujang Fanhoten ko manarimo “julo-julo”. Katiko musibah manimpo dirinyo, karano balangga di jalan kampuangnyo, indak sorang pun nan namuah manolong paja galadia ko doh. Padahal inyo lah bantuak ayam badabiah, mangalepa-ngalepa dek manahan sakik.

Baraja dari carito Ujang Fanhoten ko, maingekan ka kito baso sikap marupokan perbuatan nan bantuaknyo remeh, tapi bisa mambuek sasesuatu paliang gadang nan indak pernah tabayangkan dek kito. Lah tu yo, sampai siko se dulu. Wabillahi Taufiq Walhidayah Wassalamualaikum Warahmatullahi Wabarakatuh.


COPYRIGHT © METRO ANDALAS 2019



Komentar

Tinggalkan Balasan

Berita Terbaru